حلم الوطن
بقلم الشاعر /سايد س سابا

....

ما عاد ينسمع الاّ صوات النحيب
وعيون من كتر الدمع عمياني
والخي خيّو برصاصه يصيب
ونسقيت الارض بالاحمر القاني
..
نطرت ابنها من المدرسه تيعود
متوقّعة تستقبلو ضحكانه
وما عاد الامل عندا في الو وجود
صار كومة لحم لفلفو الكفاني
..
وين المباني الكانت شامخة طلوع
وين الشوارع الكانت عمراني
وين الحلم الكان بالراس موضوع
غابت الاحلام وانتحرت الاماني
..
وما عاد في حلم الاّ حلم الوطن
وكيف رح يرجع ع نفس المكانه
ما كنت طلعت غدّار يا هالزمن
لو م بارض الوطن نوجدت خيانه
..
تاريخك بالمجد عجبينك نكتب
من يوم السطّر المجد كنعاني
وع مر الزمن كنتي فخر العرب
وفي وقت حامل الامجاد بيعاني
...
غيمة عارضك مارءة وبتنجلي
وبالياسمين بترجعي مزدانه
وتهلّلي يا شام بنورك البهي
متل شي جوهرة بهالشرق لمعانه