رسمتك صورة

رَسَمْتِك صُورَة

ـــــــــــــــــــــــــــــــــــــــ
رَسَمْتِك صُورَه فِي خَيَالِي
مَنْحُوتَه في قَلْبِي وِفي بَالِي
رَسَمْتِك لُوحَه في ضْلُوعِي
بِيعْزِفْهَا يِلَحِّنْهَا مَوَّالِي
يَا رِيتِك تِتْرُكِي البِرْوَاز
وِتِيجِي لحُضْنِي لِعْنَيَّا
هَوَاكِي في قَلْبِي زَاد وِاجْتَاز
وَأنَا المِحْتَاج لِحِنِّيَّه
أمِيرَه ومِين هِنَا قَدِّك
بَهِيَّه ويِحْلَى بِيكِي إطَار
دَه عُود رَيْحَان عَلَى خَدِّك
مَا بَسْتَحَمِل بَارُود وَلاَ نَار
جَنَايِن فُل مِن وَرْدِك
وِصُوتِك صُوت كَمَنْجَه جِيتَار
يَا مَحْلَى الرَّد آه رَدِّك
وِإيد تِبِل رِيق مِحْتَار
وِلَو هَخْتَار أنَا رَايدِك
مَا أنَا سَنَدِك وَأنَا الخَيَّال
وَأنَا الفُرْشَا كَمَان فِي إيدِي
بِلَمْسِة شُوق يقُوم زِلْزَال
تَعَالِي وِأُحْضُنِي هَوَانَا
تَعَالِي نْلَحِّنِ المَوَّال
وِسِيبِي الفَرْحَه جُوَّانَا
تِعَلِّم فِي الهَوَى العُذَّال
وَأنَا حَبِّيت قَوي الصُّورَه
مَا دَام فِي الحُب نَاس خَايْنِين
وِهَرْسِم صُورَه وَرَا صُورَه
مَا دَام عَ الصُّورَه مِتِّفْقِين
رَسَمْتِك صُورَه فِي خَيَالِي
مَنْحُوتَه في قَلْبِي وِفي بَالِي
رَسَمْتِك لُوحَه في ضْلُوعِي
بِيعْزِفْهَا يِلَحِّنْهَا مَـــــــوَّالِي
ـــــــــــــــــــــــــــــــــــــــــــ
كلمات الشاعر أحمد شاهين
----- مصر - أسيوط -----